De navel van Zitterd
brach òs vööl door de jaore haer ! ?

Sjus wie de auw Grieke de omphalos in Delphi besjouwde ès ’t middelpunt van hun saamelaeving, zo kènne veer Zitterder de Mèrt besjouwe ès ’t sentrale plei van oos sjtèdje: de navel van Zitterd. Jeeder van òs kènt waal perseunlik in de loup van de jaore eine sjtrèng nuime, dae mit de Mèrt verbònje waor.

Jaorelank woort dat gesimboliseierd door eine kiosk, dae gebrouk woort veur vöölerlei funksies, al sjtòng hae de mertkoupluuj dèks in de waeg. Noe ligk hae te verkòmmere op ein febriksterrein, mer gelökkig zeen de medaljons bewaard gebleeve naeve de paort nao de Ursulienehaof. Is der nog haop veur de toekóms ?

Vanaaf der kronieke euver Zitterd òntsjtange, wurt der euver de Mert gesjreeve en waat dao-op allemaol loos waor. Pierre Sjtökker maakde ’t eesjte leidje dao-euver, Phil Sjaakes eine variant dao-op en Harie Brònneberg eine kòllum.

’t Gewantjhoes, opgevolg door drie sjtadhoezer vormde jaorhònderte lank ’t besjtuurlik sentrum van oos sjtèdje mit alle oetwasse, die daomit verbònje waore, zowaal sosiaal ès ekonomisch.

‘t Waor en is ’t sentrum van ooze vastelaovend, kirmese, mèrte, presessies, kafées, sirke, en nog vööl mee, tevööl om allemaol te memoreiere. Òmkrensd door sjaatse hoezer, wo vööl Zitterder, bekende en ònbekende, gebaore en getaoge zeen.

Wo de pelisse hoesde en de sjtadsfiguure kèndj aan hoes waore. Wo manefestaasies doezende luuj trõkke en mit tènte feeste en jubilea gevierd woorte.

De Mèrt waor en is veur mennige Zitterder de sosiale ontmoetingsplaatsj òm gezellig baare te bènje, of ein dröpke te drènke. Veur kènjer òm te sjpeele, zònger gevaor te loupe ònger eine auto te kòmme.

Kris kras door de jaorhònderte haer zult geer gewaar waere welke beteikenis de Mèrt haet gehad en nog haet op oos aller laeve. En, ich kèn ’t neit laote, ein bietje sjoovenistisch besjloet ich mit ein hommaasj op oos sjtèdje: