Pensionaat
St. Calvaire
Jong Zittesje maedjes
waere opgeleid veur ein sjoon toekóms ! ?
In 1860 sjtartde de begiene van de Ursuliene ein Pensjonaat oppe Auwe Mert, wo zie al vanaaf 1843 ein klooster hauwe mit ein biejbeheurende sjool veur 14 externe en eine interne leerling, waat in 1847 al oetgegruid waor pes 67 interne.
De zusters vestigde zich in een vruiger woonhoes dat bekend waor es ‘t "Hoes oppe Bergh". Dit boewerk waor geboewd in 1642 in opdrach van eine toenmalige rentmeister en woort daonao bewoond door versjeie adelikke femiejes, ónger angere: 1662 Johannes Maes, rentmeister : 1730 Jan Mathijs Maes, voogd ambt Born :1810 De Reibeld, barönke van de wal : 1830 Rudolf von Mirbach-Kempen : 1842 Burgemeister Schmitz : 1843 Jan Jacob Clemens/Deken Vrancken-Ursulinen.
Veureesj waor ’t klaslokaal gesiteweierd bènne ’t klooster zelf mer in 1870 woort eine ganse gevel opgetrókke veur ein groots aangepak pensjonaat. Dit woort ouch sjterk gesjtimuleierd door Daeke Vrancken en Keplaon Hoelen.
De eesjte moeder-overste van de Ursuliene waor ein maedje van boete Zitterd, Mère Olive (Angelica van Nooten), dat in 1856 sjtórf mer ze woort opgevolg door Zittesje mechelkes, resp. Mère Thérèse (Rutten) en Mère Scholastique (Wemans)
’t Pensjonaat waor ein kòssjool veur Jong Juffrouwe oet de deftigge Burgerie, wo Frans gekald woort en de maedjes ein degelikke opleijing kreege op Gymnasium niveau en taeves gesjoold woorte om ein hoeshauwe te besjtiere. Ouch de henjigheid om te sjtrikke, te bordure en te neeje woort hun biegebrach, wobie ’t gelouf es eine rooje draod door alles haer leip.
Veer zeen dan ouch dat tal van veuraansjtaonde Zittesje femiejes hun dochtesj daohaer sjikde, die dao soms zelfs intraoë es begien of later eine jeun trouwde en ein gezin sjtichde.
In Sint Agatha bie Cuyck bevindj zich ein auwd klooster, wo de arsjieve van kloostesj, die neit mee laevesvatbaar zeen, waere opgesjlaage en Zitterd waor dao riek veurhènj. Saame mit ’t Aezelarsjief levert dit vööl mee op ès ich uch huuj ken vertèlle, mer dat is mesjien get veur eine volgende sjpraeker.