Serviam

Serviam: Ich zal deine is ’t motto woomit saer 1931, eesj òppe Auwe Mert en saer 1959 oppe Daeke Haenraetssjtraot aan maedjes en jònges vervolgòngerwies woort gegaeve nao hun leegere sjool.

Veurtgekòmme in 1843 oet ei initiatief van de Zusters Ursuliene, die òppe Auwe Mert ei pensionaat hauwe veur jòng juffrouwe oet de deftigge burgersjtandj, die zich dat kooste leiste, toegewied aan de Heilige Ursula.

Veer numme uch mit nao markante luuj en mielpööl die Serviam karakteriseierde en huuj nog op òòs netvlies gegruf sjtaon.

’t MMS (Middelbare Maedjes Sjool) en Gymnasium vormde ònger ein daak de 2 sjoole wo-oet Serviam besjtòng. Dankzij de intervjoews van VSV mit docente van ’t Serviam koume veer mee te weite euver waat zich achter de officiëel sjirme van de sjool aafsjpeelde en waat zowaal docente es leerlinge dreef.

De Kultuur sjtòng hoog in de vaan biej ’t besjtuur waat resulteierde in kultuurreize, toneeluitvuieringe, meziek en aankleijinge van ’t geboew. De klassieke en veural ’t gebroek van ’t latien leipe dèks dwaesj door alle manifestasies haer, en de MMS’ers mouste sòms “contre coeur” ouch draan gluive.

En dat Serviam deil oetmaakde van de maatsjappelikke omgaeving bewieze waal hun jaorlikse deilnames aan de vastelaovendoptochte. “Serviam Musiceert”, ouch ein jaorliks sjpektakel tuinde de muzikale kwaliteit van de leerlinge veur de boetewach.