Oos Moodesjtaal
Jeeder van òs, mit ein zittesje mooder, haet zien eesjte weurdjes geheurd, geleerd, versjtànge en gesjpraoke op de wies die de mooder gebroekde van kleins af aan. Dat Zittesj “plat” woort in de eesjte jaore van ’t veurig jaorhòndert door ein aantal Zitterder veur ’t eesj op sjrif gesjteld in de vorm van revuus, vertelselkes en zo wiejer, die in biejeinkòmste dao-euver klassjeneierde. Dao-oet òntsjtòng de Zittesje krènk van Veldeke en den drang om dat vas te lègge. ‘t Veurig jaor tot sjtanjd gekòmme Zittesj buikske oet de jaore 1924/25 is dao eine weersjlaag van, wie ouch de Zittesje ABC en anger publikasies. En 4 van die Zitterder sjtaon sentraal in òos laezing, aangevöld mit ein oetgezochde en biejein gezeumerde seleksie van ànger zittesje dialeksjrievesj.
Poëete, die Zitterd alleneij op hun eige wies bezònge in ’t ummer verangerende Zittesj van hunne tied.
’T ZITTESJ
Woo ich hiej oppe welt ouch gaon
dat is jao gans egaal
en of ich Dutsj of Frans versjtaon
’t Zittessj blif mien taal
Mien mooder waor ei Zittesj Kèndj
dat weit ich zònger kal,
zie haet, wie eederein gevried
op ooze sjoone wal.
Zie leerde mich höör moodesj-taal
zoo saapig wie ein paer,
zie hauw de pap
en poete leif en Zitterd hauw zie gaer.
’t Zittesj, kènjer, is zoo sjoon
egaal waat ouch gebeurt,
dan vèndj geer, waat ’t ouch maag zeen
de gou Zittesje weurd.
Wens doe dien kèndj get zègge wils
zoo vol is dien gemoud,
dan zèk ’t in ’t Zittesj, jòng
zoo klink ’t ummer goud.
En woo me in ein anger taal
menuute neudig haet,
dan weit dat eine Zitterder
in zeeve weurd dat zaet.
En mòt geer èns de gaerd aafgaon
laot dan de jeug hiej nao,
òs heerlik Zittesj dialek
zoo blif ’t ummer dao.
Frenske van Zitterd
Veer wùnsje uch eine sjoone aovend toe
