Geveltekste Zitterd,
In mien arsjiefke waar ich saer ettelikke jaore al geveltekste biejein aan 't zuimere, mer neit goud weitend waat ich daomit aanmous.
Heurde dat ouch bie ’t Zittesj Woonverlede, wie Thei Oberdorf dat gemeind haw? Waore ’t allein mer kómmersjeel verdwene opsjrifte oet eine tied dae alweier wied achter ós ligk? Wo me wiejer niks mit kènt? Of zout dao ein verhaol achter, dat mee zaet euver de eigenaere of oetbatesj van ein gesjefspandj en de boodsjap die ze via hun waar wouwe euverbrènge nao klantje en passante?
Dat ’t sjienbaar toch waal waerd haw woort kortelings óngersjreve door ’t feit dat de VSV dat in zien laezinge-euverzich 2024 honoreierde en dat wèthawwer Andries Houtakkers de aangepasde gevelteks van De Hollande oppe Mert in Zitterd op 11 meert '24 haet ónthuld, es eesjte van de reeks reconstructies, die hae van plan is de kómmende jaore te realiseiere ( 2 per jaor ) óm de Zittesje bènnesjtad nóg mee cachèt te gaeve.
Waat zich allemaol haet aafgesjpeeld in dat pandj doon veer uch vanaovend oet de duik en veer haope dat de kombinasie beeld, geveltèks en tekste oet ’t Aezelarsjief aansjleit en de muijte waerd is om hie nog ein vervolg aan te gaeve.
Vanaovend zulle veer zo’n dartig panjer mit hun tekste en weitenswaerdighede, wo veer genóg van weite óm uch verantjwoord te presenteiere, de revue laote passeiere.
Väöl aevel weite veer nog neit van de dik 200 panjer, die ós mit tekste zeen euvergeleverd, en veer doon dan ouch ein beroup op op uch óm ós mit eur eige arsjiefkes, fotoalbums en herinneringe te helpe zoväöl muigelik van ’t Zittesj woonverlede digitaal te behawte.
Es veurbeeld maag deze winkel van Timmermans in de Pötsjtraot (ròndj 1930) deine, wo veer allein de naam van kènne. Waat waar dat veur ein gesjef?
Veer wunsje uch eine sjoone aovend toe !
