Went me ’t haet euver Kleikamp, dan wit jeedere Zitterder waat bedoeld wurt: dat gesjef oppe knik van Veursjtad en Parklaan, ein sjtaats pandj mit teurekes mit óm de houk ein klein kesteelke. Dao waor van al te koup, veural  iezerwaare, pindraod, vöölerlei gereidsjap, inmaak-wégkkaetele en flesje, mer ouch de meis sumpele klómpenaegelkes.

Saame mit Ben, ein van de naozaate van Kleikamp prebeiere veer vanmiddig veur uch ’t ontsjtaon en veurtgank van dees panjer te óntsjloete.

Nikkela Rutte haw in 1880 op nómmer 2 eine wienhanjel in dat sjtaatse pandj en hae boewde in 1904 op ziene aangrenzende gróndj oppe Parklaan veur zien maedje, Jetje Janse, Casa Mia es ein saort kesteelke mit teurekes, dat naoderhandj es ’t kleinste kesteelke van Nederlandj woort besjouwd.

Veur zien pandj langs haw hae eine toegank nao de baek laote maake, de zoganaamde “Veedrink” wo de paerd van ziene wienhanjel en van de boerehäöf oppe Sjteinwaeg kooste drènke en gedrénk woorte.

Oppe Sjteivig nómmer 390 (Veursjtad 3) haw Hubert Bernard Christiaan Kleikamp in 1918 ein Kuuperie en Vaatehanjel en in 1929 koch hae ’t pandj Veursjtad 2 bie de brögk wo hae ein gesjef begoos, wo alle saorte van iezerwaare te koup woorte aangebao. Ein begrip in Zittert en wie ómsjtreeke !!

In 1968 noum ziene zoon Hub deeze hanjel euver pès 1983. In 1960  waar Hub auch zien eige internasjonaal bekend gewoare modelvleigsjport zaak begoos, met eige im- en export en produksie. Hub haw ein brei belangsjtelling veur allerlei zaake en breide ’t assortiment wied oet mit sjpeelgoud en modeldooze, mer veural waor hae geïinteresseierd in de techniek van vleigmesjinkes. Hae waor in 1936 de grote sjtimulator van de S.L.C, de Zittesje Luchtvaart Club. In 1956 woort hae de secretaris van de K.S.I., de Katholieke Luchtvaart Club Sittard veur beginnesj en wesjtriedvleigesj en in 1963 woort deilgenómme aan de Wereldkampioensjappe in Genk.

Ouch maatsjappelik deig Hub van zich sjpraeke es lid van de vastelavesvereiniging en neit te vergaete de AODL, de keigelklup Ach Om De Lange. Hub Kleikamp waor auch veurzitter van de Filatelist en aktief in de Vincentius vereiniging.