Zittert in de jaore 20,
“The Roaring Twenties
Pès 1928 waor de ekonomische òntwikkeling in de VS grotendeils positief, mit indrökwekkende technologische en sociale veuroetgank. De Verenigde Staten woorte op vööl òngerdeile es veurbeeld veur Europa gezeen. In ein filmke van ca 5 minuute laote veer uch dao effe mit kennis make.
De VS kende een kultureel oplaeving: jazzmuziek, danssjtiele wie Charleston, Foxtrot, Lindy Hop, Swing, Hollywood mit de films, radio, sjporthelde es Babe Ruth, en flappermode. De Amerikaanse laevessjtiel woort weltwied bewònjerd – ouch in sjtae es Amsterdam en Zittert.
’t Meis opvallende van dat tiedvak waor òngetwiefeld de emancipatie van de vrouw, die zichzelf ein geliekwaerdige nuuj rol versjafde bènne ’t gezin en de maatsjappie. Zowaal in de Mode: korte rök, bobkapsels, segrette in lang piepkes, eine radikaal angere “look” es veurhaer. In Gedraag: mee vrieheid, zelfsjtenjig wone, oetgaon, danse, wirke. In höör Rechte: in vööl westerse lenj krege vrouwe sjtömrech (bijv. Nederlandj in 1919). In Wirk en opleiding: mee vrouwe gonge sjtudeiere of wirkde boeteshoes. Taegegeluude waore der ouch. Traditionele groepe vònje dit “onzedelijk” of bedreigend veur de maatsjappelikke orde.
En nao de verwirking van de eesjte Weltkrieg pakde de ganse maatsjappie, organisasies, vereiniginge, òngernummesj en partekleiere, mans- en vrouwluuj, ’t laeve weijer op, gebroekmakend van alle nuuj òntwikkelinge, veural vanoet Amerika.
Dat resulteierde In Zitterd ouch in ein oplaeving van de Zittesje Sjpraok. Dao koume versjeie nuuj buikskes oet en ouch de heere geistelikke leite zich neit onbetuug en leverde 2 toneelsjökker aaf, ’t bekende Rampjaor 1677 van Pater Schreurs en de Geesel van Zittert, wo, zunj genòg, mer beperkte informasie euver veurhenj is. Gesjreve door Pater Justinus Janssen O.F.M. ’t Sjtök woort destieds opgevuierd in ‘t Patronaat in Ophaove. Pater Justinus Janssen waor eine franciscaan. dae bekend stòng om zien religieus geïnspireierde toneelsjtökker. Hij sjreef ònger angere ‘t Sint Franciscussjpeel, dat in 1927 woort uitgevuierd in Tegele, en Onze Lieve Vrouw van Genooi, dat in 1926 woort opgevuierd bie gelaeg van het 500-jerig besjtaon van t bedevaartsoord bie de kapel van O.L. Vrouw van Genooi .
En dat alles gòng goud pes daensdig 29 oktober 1929, wie in New York de grote beurscrash plaatsj vònj, wovan Amerika en de ganse welt de konsekwensies òngervònje en in eine deipe krisis trökveile.